Jamiyat taraqqiyotiga tahdid solayotgan muammolardan biri — korrupsiyadir. Bu illat nafaqat davlat va jamoatchilik ishonchini zaiflashtiradi, balki insonlarning hayotga, adolatga, qonun ustuvorligiga boʻlgan ishonchini ham emirib boraveradi.
Bugungi siyosiy oʻqishda Kiberkorrupsiyaning jamiyat tanazzuliga salbiy ta’siri hususida batafsil ma’lumot berildi.
Kiberkorrupsiya—bu raqamli texnologiyalar va onlayn tizimlar orqali amalga oshiriladigan korrupsion faoliyat turi boʻlib, u jamiyatning tanazzuliga yangi, yanada xatarli koʻrinishda ta’sir koʻrsatadi. Buning salbiy oqibatlari quyidagicha izohlanadi:
1. Ishonch inqirozi va shaffoflik yoʻqolishi
Kiberkorrupsiya — ayniqsa, davlat xizmatlaridagi elektron platformalarda ma’lumotlarni soxtalashtirish, tanlov va tenderlarni faoliyatsiz oʻtkazish, ma’lumotlar bazasini manfaatdor shaxslar foydasiga oʻzgartirish orqali amalga oshirilsa — jamoatchilik orasida davlatga boʻlgan ishonchni yoʻqqa chiqaradi. Bu jamiyatda qonun ustuvorligiga nisbatan ishonchsizlikni kuchaytiradi.
2. Axborot xavfsizligiga tahdid
Kiberkorrupsiya axborot tizimlarining xavfsizligini izdan chiqaradi. Davlat siri yoki shaxsiy ma’lumotlarning fosh boʻlishi orqali jamiyat axborot tahdidi ostida qoladi. Bu esa inson huquqlari va erkinliklariga jiddiy zarba beradi.
3. Iqtisodiy tanazzul
Korrupsiyaning raqamli koʻrinishi byudjet mablagʻlarining samarasiz sarflanishiga, investorlar ishonchining susayishiga va raqobat muhitining yoʻqolishiga olib keladi. Natijada iqtisodiy oʻsish sekinlashadi, yangi ish oʻrinlari kamayadi.
4. Yoshlar orasida beqarorlik va nigilizm
Kiber maydonda adolatsizlik va tugʻri emas natijalarni kuzatgan yoshlar, bilim va mehnat bilan maqsadga erishish imkonsiz, deb xulosa chiqara boshlaydilar. Bu ularning motivasiyasini pasaytiradi, tanqidiy fikrlash oʻrniga befarqlikni shakllantiradi.
5. Fuqarolik jamiyatining zaiflashuvi
Jamoatchilik nazorati va faolligi zaiflashadi. Aholi davlat idoralariga murojaat qilishdan, faol ishtirok etishdan tiyiladi. Bu demokratik jarayonlarning inqirozini anglatadi.
Kiberkorrupsiyaning ta’siri koʻzga koʻrinmas, ammo juda chuqur va keng qamrovli. Unga qarshi kurashish uchun jamiyatda raqamli savodxonlikni oshirish, axborot tizimlarining xavfsizligini ta’minlash, fuqarolar va davlat xizmatchilari orasida mas’uliyatni oshirish juda muhim.
Ayniqsa, ta’lim tizimida korrupsiyaviy holatlarning mavjudligi — mamlakat kelajagi boʻlgan yosh avlod taqdiriga jiddiy xavf soladi.
Bugun boʻlib oʻtgan siyosiy oʻqishdan barchamiz tegishli xulosa chiqarishimiz lozim.
Zero, korrupsiyaga qarshi kurash — bu faqat davlatning emas, balki har bir fuqaroning burchidir. Ayniqsa, kelajagimizni tarbiyalayotgan ta’lim sohasida bu boradagi mas’uliyat yanada baland boʻlishi kerak. Chunki adolatli va shaffof ta’lim tizimi — barqaror va gullab-yashnagan kelajak garovidir.
