Bugun, 2025-yil 21-oktabr kuni, O‘zbek tiliga Davlat tili maqomi berilganining 36 yilligi munosabati bilan butun mamlakatimiz bo‘ylab keng ko‘lamli bayram tadbirlari bo‘lib o‘tdi. Toshkent davlat tibbiyot universiteti jamoasi ham ushbu ulug‘ ayyomni munosib nishonlash maqsadida poytaxtimizning ma’naviyat maskani – Adiblar xiyobonida tashkil etilgan ma’rifat sayillarida faol ishtirok etdi.
Universitet professor-o‘qituvchilari, xodimlari va talabalaridan iborat katta jamoa Adiblar xiyoboniga tashrif buyurib, buyuk ajdodlarimiz – Alisher Navoiy, Zulfiyaxonim hamda Berdaq kabi so‘z mulkining sultonlari hamda zamonaviy o‘zbek adabiyoti namoyandalari haykallari poyiga gulchambarlar qo‘yishdi.
Tadbir doirasida tashkil etilgan g‘azalxonlik va ma’rifat sayillari universitet ning Bosh, Pediatriya va Stomatologiya kampuslari jamoasi ishtirokida yanada mazmunli tus oldi. Talabalar o‘zbek adabiyotining durdona asarlaridan parchalar, mumtoz g‘azallardan namunalar o‘qib, barchani hayajonga solishdi. Ayniqsa, tibbiyot sohasida xorijdan kelib tahsil olayotgan xindistonlik va koreyalik yoshlarning ona tilimizga bo‘lgan yuksak hurmati, so‘zga bo‘lgan ehtirosi, ularning ijodiy chiqishlarida yaqqol namoyon bo‘ldi.
Universitet rahbariyati va professor-o‘qituvchilari o‘z chiqishlarida tilning millat ruhi, madaniyati va tarixini o‘zida mujassam etuvchi buyuk ne’mat ekanligini ta’kidlab, har bir fuqaroni, ayniqsa, yoshlarni davlat tiliga hurmat bilan qarashga, uning qadrini anglab, o‘zaro muloqot va kasbiy faoliyatda to‘g‘ri va go‘zal qo‘llashga chorladilar. Shuningdek, tibbiyot kabi nozik sohada ham davlat tilining qo‘llanish doirasini kengaytirish, ilmiy atama va tushunchalarni o‘zbek tiliga o‘girish muhimligi alohida qayd etildi.
Adiblar xiyobonidagi bu kabi tadbirlar yoshlarni milliy g‘urur ruhida tarbiyalash, ularning ma’naviy dunyosini boyitish, tilimizga, adabiyotimizga bo‘lgan mehrini oshirishda beqiyos ahamiyatga ega. Universitet jamoasining faol ishtiroki universitetning nafaqat ilm-fan va ta’limda, balki ma’naviy-ma’rifiy hayotda ham yetakchi o‘rin tutishidan dalolat beradi.
O‘zbek tiliga Davlat tili maqomi berilganining 36 yilligi muborak bo‘lsin! Tilimizning jozibasi, go‘zalligi va boyligi abadiy yashasin!
